10.06.2021

Məktəb direktorları ilə onlayn görüş keçirilib

Qazax Rayon Təhsil Şöbəsinin növbəti iclası keçirildi. İclası giriş sözü ilə açan RTŞ-nin müdiri Nizaməddin Babanlı “Yay məktəbi”nin təşkili, milli qiymətləndirmənin keçirilməsi ilə bağlı rayon ümumtəhsil məktəblərinin direktorlarına tapşırıq və tövsiyələrini verdi.

Təhsil Şöbəsinin əməkdaşları məktəb direktorlarını maraqlandıran məsələlərlə bağlı suallarını cavablandırdılar.

  Ümumi təhsil müəssisələrində təşkil olunacaq yay məktəblərində iştirak etmək istəyən təhsilalanların valideynləri (və ya digər qanuni nümayəndəsi) qeyd edilən tarixdən başlayaraq ərizə ilə ümumi təhsil müəssisəsinin rəhbərliyinə müraciət edə bilərlər.

“Yay məktəbi”ndə bütün ümumi təhsil müəssisələrinin I-X sinif şagirdləri ödənişsiz və könüllü əsaslarla iştirak edə bilərlər.

I-IV siniflərdə tədris həftədə 5 dəfə gündəlik 3 saat olmaqla, V-X siniflərdə isə həftədə 5 dəfə gündəlik 4 saat olmaqla təşkil olunacaq. I-IV siniflərdə məşğələlər tədris dili, riyaziyyat, xarici dil fənləri üzrə keçiriləcək. V-X siniflərdə məşğələlər tədris dili, riyaziyyat, xarici dil fənləri və ümumi təhsil müəssisəsinin rəhbərliyinin qərarı ilə digər 3 fənnə veriləcək.

Qeyd edək ki, “Yay məktəbi” şagirdlərin zəruri bilik və bacarıqlarının möhkəmləndirilməsi, öyrənilənlərin ümumiləşdirilməsi məqsədilə təşkil edilir. “Yay məktəbi” iyunun 16-dan 30-dək davam edəcək.


Açar sözlər: ,  ,